صحیح بخاری کتاب العلم میں نبی رحمت (ﷺ) کا یہ ارشاد نقل کیا گیا کہ " اللہ تعالی نے مجھے جس علم و ہدایت کے ساتھ بھیجا ہے اس کی مثال زبردست بارش کی سی ہے جو زمین پر خوب برسے پھر زمین کے اچھے قطعے اس پانی کو جذب کرتے ہیں اور خوب سبزہ اور گھاس اگاتے ہیں۔
زمین کے بعض قطعے سخت ہوتے ہیں وہ پانی کو روک لیتے ہیں اور اس پر جھیل سی بن جاتی ہے اس سے مخلوق خدا کو نفع پہنچتا ہے لوگ اس کو پیتے پلاتے ہیں اور اپنے کھیتوں کو اس سے سیراب کرتے ہیں ۔
زمین کے بعض حصے چٹیل میدان ہوتے ہیں وہ پانی کو جذب کرلیتے ہیں مگر وہ کوئی سبزہ گھاس نہیں اگاتے ۔
پہلی مثال اس شخص کی ہے جس نے علم دین کو سمجھا اور اس علم و ہدایت سے نفع اٹھایا اور مستفید ہوا جو اللہ تعالی نے میری وساطت سے نازل فرمائے ہیں ۔
دوسری مثال اس شخص کی ہے جس نے خود بھی سیکھا اور دوسروں کو بھی سکھایا ۔
اور تیسری مثال اس شخص کی ہے جس نے توجہ نہیں دی اور اللہ تعالی کی جو ہدایت میرے ذریعے پہنچی تھی اس کو قبول نہیں کیا "
(صحیح بخاری ، کتاب العلم)
مذکورہ حدیث پاک کے مطابق اس بلاگ کے اجرا کا مقصد ہے کہ قرآن مجید ، اس کی زبان اور علوم کو اس بلاگ کے ذریعے آپ تک پہنچانے کی حتی المقدور کوشش جاری ہے ۔
یہ ایک آن لائن ڈائری ہے جو آپ کے استفادہ کے لیےترتیب دی گئی ہے ۔ خاص کر بر صغیر کے ان طلبہ و طالبات کے لیے جو اسلامیات قرآن ، اس کی زبان اور علوم کا مطالعہ اور تحقیق کررہے ہیں ۔